October 8, 2014

Tagged Under: ,

How did Sajin Vaas assault Chris Nonis

By: Blog Poster On: 9:07 PM

සජින් වාස් ක්‍රිස් නෝනිස් ඇවිළුණු හැටි

ඇමරිකාවේ නිව්යෝර්ක් නුවරදී මෙරට විදේශ කටයුතු අමාත්‍යංශයේ අධීක්ෂණ මන්ත්‍රි සජින් වාස් ගුණවර්ධන සහ බි්‍රතාන්‍යයේ ශ්‍රී ලංකා මහ කොමසාරිස් වෛද්‍ය ක්‍රිස් නෝනිස් අතර ඇති වූ ගැටුම පසුගිය සතියේ රට තුළ මෙන්ම අන්තර්ජාතික වශයෙන්ද දැඩි කතාබහට ලක්විය.ඇමරිකාවේ නිව් ජර්සි ප්‍රාන්තයේ පිහිටි ශ්‍රී ලන්කන් එයාර් ලයින්ස්හි නිව්යෝර්ක් නියෝජිත ඩිලාන් ආරියවංශගේ නිවෙසේ පසුගිය 23 වැනිදා පැවැති රාත්‍රි භෝජන සංග්‍රහයක් අතරතුරදී මෙම සිදුවීම සිදු වී තිබේ. එම අවස්ථාවට සජින් වාස් ගුණවර්ධන මන්ත්‍රිවරයා, විදේශ කටයුතු අමාත්‍යංශයේ ලේකම් ෂෙනුකා සෙනෙවිරත්න, වොෂින්ටන්හි ශ්‍රී ලංකා තානාපති කාර්යාලයේ දේශපාලන කටයුතු භාර තනූජා ගීනේන්ද්‍ර උස්ලියනගේ, ජනමාධ්‍ය ඇමැති කෙහෙලිය රඹුක්වැල්ලගේ දියණිය වන චමිත්‍රි රඹුක්වැල්ල සහභාගි වී සිට ඇති අතර පසුව එම ස්ථානයට බි්‍රතාන්‍යයේ ශ්‍රී ලංකා මහ කොමසාරිස් ක්‍රිස් නෝනිස් සහ ඇමෙරිකා එක්සත් ජනපදයේ ශ්‍රී ලංකා තානාපති ප්‍රසාද් කාරියවසම්ද පැමිණ ඇත.

මධ්‍යම රාත්‍රිය උදාවන විට මෙම ගැටුම ඇරැඹී ඇති අතර, එක් පාර්ශ්වයකින් දිගින් - දිගටම පිට වී ඇත්තේ අසභ්‍ය වදන්ය. නෝනිස් මහතා අසලටම පැමිණ ඇති සජින් වාස් මන්ත්‍රිවරයා ෂෙනුකා සෙනෙවිරත්න මහත්මිය සම්බන්ධයෙන් පැවැසූ බව කියන අපහාසාත්මක ප්‍රකාශයක් පිළිබඳව නෝනිස්ගෙන් විමසා ඇත. නෝනිස් එවිට පවසා ඇත්තේ තමන් කිසිසේත්ම එවැන්නක් නොපැවසූ බවත්, තමන්ගේ කට අවුස්සා නොගන්නා ලෙසත්ය.

මෙහිදී 'මොකද ඔය විදියට බලන්නෙ' යනුවෙන් විමසමින් සජින් වාස් මන්ත්‍රිවරයා ක්‍රිස් නෝනිස්ගේ වම් කම්මුලට පහරක් ගසා ඇතැයි නෝනිස්ගේ පාර්ශ්වයේ ආරංචි මාර්ග සඳහන් කරයි. මෙහිදී නෝනිස්ට පහර කිහිපයක්ම එල්ල වී ඇති අතර 'හිතනවද තමුන්ට ජනාධිපතිතුමාගෙ සහයෝගය තියෙනවා කියලා.
මම හොඳ වීදි සටන්කරුවෙක්' යැයි පවසමින් මෙහිදී තවත් අසභ්‍ය වචන කිහිපයකින් අනෙක් පාර්ශ්වය නෝනිස්ට බැන වැදී ඇත.
මීට මාසයකට පෙර විදේශ කටයුතු අමාත්‍යංශයේ ලේකම් ෂෙනුකා සෙනෙවිරත්න විසින් තම හිතවතුන්ට පවසා ඇත්තේ බි්‍රතාන්‍යයේ ශ්‍රී ලංකා මහ කොමසාරිස් ක්‍රිස් නෝනිස් තමන්ට අපහාස කළ බවයි. එහෙත් ඊට අදාළව කිසිදු පැමිණිල්ලක් ඇය විසින් ඉදිරිපත් කර නැත.

මෙම සිද්ධියෙන් පසු 24 වැනිදා අලුයම දෙකට පමණ ක්‍රිස් නෝනිස් එම ස්ථානයෙන් පිටව, තමන් නැවතී සිටි හෝටලයට ගොස් ඇත.
පසුදින උදෑසන නිව්යෝර්ක් රෝහලකින් ඔහු කන් ඇසීමට අදාළව ප්‍රතිකාරද ලබාගෙන තිබේ.
මෙම සිද්ධියෙන් පසුව මහ කොමසාරිස්වරයා විසින් සිය ඉල්ලා අස්වීමේ ලිපිය ජනාධිපතිවරයා වෙත යොමුකර තිබූ අතර, අවසානයේදී පසුගිය 4දා එය පිළිගැනීමට ආණ්ඩුව තීරණය කර තිබිණි.

මේ අතර මේ සම්බන්ධයෙන් අදහස් දක්වමින් සජින් වාස් ගුණවර්ධන මන්ත්‍රිවරයා පවසා තිබුණේ තමන් ක්‍රිස් නෝනිස්ට පහර නොදුන් බවත්, දෙදෙනා අතර උණුසුම් වචන හුවමාරුවක් පමණක් සිදු වූ බවත්ය. මන්ත්‍රිවරයා වැඩිදුරටත් සඳහන් කර තිබුණේ ඒ අවස්ථාවේ විදේශ කටයුතු අමාත්‍යංශයේ ලේකම් ෂෙනුකා සෙනෙවිරත්න සහ ඇමරිකා එක්සත් ජනපදයේ ශ්‍රී ලංකා තානාපති ප්‍රසාද් කාරියවසම්ද සිටි බවයි. 

(mawbima.lk)
Loading...